منتديات 12 شات
أهلا ومرحبا بكم في منتداكم منتدي شات 12 .. نتمنى لكم طيب التواجد
المواضيع الأخيرة
» الكلام أو الموت
أمس في 7:39 pm من طرف فتى المهام الخفية

» سجل حضورك بإسم لاعب تحبه
أمس في 4:44 pm من طرف okA

» حالتك المزاجية !!!!
أمس في 4:43 pm من طرف okA

» في يوجياكارتا فوق الغيوم!
الخميس 19 أكتوبر 2017, 10:29 pm من طرف روان الناجي

» صحة الفم والاسنان
الخميس 19 أكتوبر 2017, 10:04 pm من طرف روان الناجي

» 8 طرق لتسويق فعَّال لعلامتك التجارية
الخميس 19 أكتوبر 2017, 9:49 pm من طرف روان الناجي

»  ضحايا “تفجيرات مقديشو”
الخميس 19 أكتوبر 2017, 9:33 pm من طرف روان الناجي

» فين الناس الى بنحبهم
الإثنين 16 أكتوبر 2017, 1:26 pm من طرف عاشق حروف هـ

» ولي العهد الأمير محمد بن سلمان والوعد بالأقتصاص من التطرف
الأحد 15 أكتوبر 2017, 8:46 pm من طرف روان الناجي

انت الزائر رقم ..

Website counter

ليه ما نلغيش العملة .؟

استعرض الموضوع السابق استعرض الموضوع التالي اذهب الى الأسفل

ليه ما نلغيش العملة .؟

مُساهمة من طرف ahmed 22 في السبت 12 أغسطس 2017, 12:15 am

قالك ان الرجل رئيس الوزراء الجديد بتاع الهند الحج مودي رفع الله شأنه اول ما وصل في 2015 قالك هنعمل نظام جديد ومشروع تسهيل اقامة 220 مليون حساب بنكي جديد للهنود ..
وبالتالي لاقوا عدم اقبال من الهنود وانه فقط 15% هما الي عملوا حساب وبالتالي فيه ندرة نقدية وازمة سيولة في الاقتصاد ومن الاخر يعني الشعب الهندي بيحب فلوسه في حضنه وطبعا معدلات الفساد عالية والمال الفاسد كتير وصعب انه يتحط في البنوك ..
 
المهم  قام  عمل اجراء اقتصادي السنة اللي فاتت في اواخر 2016 بأنه الغي عملتين من الفئات الكبيرة اللي هما ال500 روبية وال 1000 روبية ... في خطوة للقضاء علي الفساد والتهرب الضريبي والكلام ده ...
 
الكلام ده ليه
 
بحيث مثلا انت كمواطن بديك مدة محددة انك ترجع للبنك الفئتين دول وتستبدلهم بنوع جديد من الفئات ... وبالتالي انا اعرف انت مخبي تحت البلاطة كام ... وبالتالي انت متهرب بكام ..
وبالتالي افشخك في الضرايب ههههه او انك رجل فاسد بتاع مخدرات او مهرب اموال وبتغسل اموال وكدا فمن اين لك هذا وبالتالي نحاربك كنوع من الفساد .. واخد منك حق الدولة ..  
طبعا في طرق للمهرب انه ممكن يدور الفلوس دي بس علي المدي البعيد الموضوع ده هيكون ليه صدي افضل ..
 
دي خطوة بيقولوا عليها مهمة جدا بالنسبة للهنود انهم يقضوا علي الفساد اللي كان متوغل وكمان ليها فايدة اقتصادية علي المدي البعيد ..
بس دي طريقة انهم يحاولوا يصلحوا من اوضاعهم وجالهم واحد جرئ قدر يعمل اجراء وخلي الفئات البسيطة من الشعب تتحمس ليها .. طبعا احنا مش عارفين النتيجة النهائية ايه للعملية بشكل كامل  ..
بس فيه اجماع علي الاقل علي حكمة الرجل اللي بيقود ..
 
في برضه مثال تاني للاصلاح الاقتصادي ..
 
بعد الحرب العالمية الاولي .. تم فرض عقوبات اقتصادية علي المانيا فوق 100 مليار مارك
كتعويضات في معاهدة فرساي وكدا .. وكانت المانيا برضه عندها خساير في البنية بتاعتها اللي كانت مدمرة والدنيا خراب يعني .. فكانوا زي ما تقولوا كدا سلام يدعوا للحرب .. يمكن ده اللي خلي البيئة مهيئة انه هتلر ينشر الفكر النازي وقتها ويقول ان سبب الحصار الاقتصادي ده هو اليهود للي هما متحكمين بالمال وبالتالي يعزز كراهية الالمان ليهم وكدا ..ويحرقوهم بكل برودة اعصاب ..
 
بس مش ده قصتنا
احنا بنكلم في اقتصاد دلوقتي ههههههه
 
المهم واحد عبيط في المانيا قالك الحل في الوكسة دي ده انك تطبع فلوس ..
وبالتالي الطباعة بغير حساب بيعمل تضخم وبيقلل من قيمة العملة ..
 
كان الدولار سنة 1921 ب 4 مارك
لاحظ الفرق اللي هيحصل دلوقتي
لانه احنا عندنا في مصر التضخم وصل ل 34 % وهنعيط 
 
معدل التضخم الشهري في المانيا وصل سنة 1923 ل 29500%
انا مش ببالغ دي معلومة علي الويكيبديا يعني وهكملها
يعني معدل صرف ل 2 تريليون مارك مقابل كل دولار ..
بيقولك الالمان والاسر الفقيرة وقتها كانوا بيستخدموا المارك ويحطوه في المدفئة بدلا من الفحم وبيقولك كدا ارخص من انك تشتري الفحم ... يعني تصخم مفرط ..
 
المهم وقتها عشان المانيا تخرج من المأزق ده ... عملت ايه برضه
ايون كلامك صح .. لغوا المارك  .. وانشأوا بنك مركزي مستقل
وادخلوا عملة جديدة سموها _ الرنتنمارك _ وعملوا امكانية تحويله
لسند ذو قيمة دهبية ... وبالتالي انخفض التضخم ...
                                        ا
يا اخي برضه الفترة بتاع الحروب العالمية دي فيها كمية دروس
كل ما تقري عنها تستغرب ...
 
 
ادي مثالين عندنا ...
واحد كان عنده ندرة في الاموال في البنوك
والتاني كان عنده تضخم ..
 
والحل كان الغاء العملة سواء بشكل جزئي او كامل واستبدالها بشكل جديد ..
 
احنا بقا نيجي  لمصر ام الدنيا
عندنا كمية اموال رهيبة في البنوك ومركونة وعندنا كمية فلوس تحت البلاطة مركونة برضه ومش بيتم استخدامها احنا اللي غلبنا الكل عندنا من ده وده .. احنا دايما عندنا الميكس  ...
 
وبالتالي الدولة كل اللي بتعمله برضه ميكس انها بتطلع قروض بفايدة تعتبر قليلة
وفي نفس الوقت تقولك تعالي حط فلوسك في البنك واعملي  شهادات بنكية بفايدة ثابتة تصل ل 20 % علي عكس كل دول العالم ..
 
يعني كلعبة صغيرة رجال الاعمال بيعملوها 
 ودي معلومة كدا علي الماشي ههههه
يعني ممكن تجيب قرض بفايدة متناقضة 10% وتتلاعب
وتقوم مدخله بصورة وهمية كأنه لمشروع عن طريق شخص ممكن يكون في العيلة 
وتقوم محوله لشهادات بنكية بفايدة تصل ل 20 المية
 
يعني طرح ال 20 من 10 يطلعلك 10 في المية مكسب
بتشغيلة دماغ صغيرة ... يعني ممكن تضاعف في ثروتك في 3 سنين بمنتهي السهولة ...
 
 
هنا السؤال اللي مش عارف صح ولا غلط أنه يتسأل بعد المثالين دول
هل الحل انه ممكن نلغي العملة ونبدلها بشكل جديد بدل ما حنا محتارين في النص جنيه ننزله فضة ولا ورق ؟
 
دي نقطة
 
النقطة التانية هترجعنا للزغلول الكبير ( الدولار )
 
 الدولة عمالة تقول هنرجع الدولار لقديمه تاني وماعرفش ايه
انا السؤال اللي مضايقني


انت ايه امكانياتك انت عشان ترجع الدولار لقديمه ولا انت عملت ايه
الدولار يدخل البلد يعني 


( الصادرات - قناة السويس - سياحة - تحويلات المصريين )


طبعا تحويلات المصريين بلح ..
بس فين صادراتك كدولة اللي هتدخل الدولار للبلد
فين تطويرك لمراكز السياحة في البلد عشان تزود عدد سياحك
ده انت السياح بيتنصب عليهم اكتر ما بيتفسحوا وبيركبوا الجمل في الهرم نص ساعة
 ب 1000 جنيه والمصريين بيركبوه ب 500 اه والنعمة .. حكيكة
 
اصلا انت قناة السويس بتاعتك اللي فرحان بيها.. فيه اتجاه لاستخدام بحر الشمال في القطب المتجمد
لانه بدون أي تكاليف والتغير المناخي قد يخدم وبيحاولوا يوفروا وسائل الامان
 وروسيا والصين اكتر المقبلين عليه كمان  .. وكل سنة السفن بتزيد من هناك
وفيه اكتر من دولة ومنهم اسرائيل كل حلمهم انهم يعملوا ممرات مائية زي قناة السويس واكيد كل واحد فيهم هيحط عليها امتيازات وينافسوك يعني المستقبل مش بتاعك ... واصلا حجم التجارة العالمي بيقل بسبب الكساد و وتراجع استخدام البترول .. واصلا انت بنيت التفريعة بتاع قناة السويس وصرفت عليها 8 مليار دولار ومتخيل انك هتوصل لصادرات بعد 6 سنين ل 24 مليار والقناة رجعت صادراتها السنة اللي فاتت من 6 ل 5 مليار .. واصلا انت يا حج وانت بتكلم علي القناة من كام يوم
وشفتك بعيني .. وانت بترمي كلمتين يخلعوك من الحكم ... وانت بتقول المثريين بيقولوا ان قناة السويس الجديدة مش هيكون ليها عوايد افضل ... بس يا مصريين انا شايف انه قناة السويس لو كان كل هدفها اننا نعمل مشروع يجمعنا كلنا فأنا شايف ان ده الاهم .. يعني بيبري ذمته من القناة بالطريقة وبيمهد للخازوق الاعظم ...
مش هرد عليك علي فكرة  ... الله يسامحك ..
 
مش عارف انا طولت في نقطة قناة السويس دي ليه
شكلي كنت معبي هههههه
 
المهم 
 
انا مش عارف انا بكلم اقتصاديا صح ولا غلط
بس في حاجات غير منطقية في الاقتصاد المصري بتحصل
والتراكمات الكتير نتيجة السنين اللي فاتت انا شايف سواء كان فيه ثورة ولا لاء
كنا هنوصل لنفس النقطة الموجودة حاليا عاجلا ام اجلا ...
وانا حاسس انه  كل اللي بنعمله ان احنا بنأجل القدر المحتوم ليس الا ..
مش عارف هي نظرة فيها تشاؤم ولا ايه اكتر منها تفائل ...
بس يمكن ده الواقع 
 
بس ده هيخليني انتقل للنقطة التالتة وهي السوق وعوامله السلبية في اسفل الهرم ..
 
حاليا الشركات في البلد سواء عالمية او محلية بقت التكلفة عليها بتزيد كل يوم سواء بحاز ولا بنزين ولا الجمرك للمواد اللي بتصنع هنا ..
وكل ما التكلفة بتزيد .. كل ما ينفخونا برفعة سعر .. واللي بيرفع مش بيرجع ...
تقوم الدولة حاطة عليهم شوية ضرايب ... هما يسكتوا لاء .. يقوموا رافعين هما كمان مش هيدفعوا من جيبهم هما  .. المواطن يشتري راحته بالغالي ..
 
طبعا الكساد بيحصل ... وفي اجراءات تعامل بين الشركات والتجار اللي بتروج منتجها بتحصل
يمكن الناس العاديين مش واخدين بالها منهم ... ممكن اكلم عليها بعدين بس ابرزها ان التعامل بين الشركات والتاجر بعمولات لم تتغير منذ سنوات ولا توائم العصري الحالي وفي نفس الوقت كل ربحية التجار اخر سنتين معتمدة فقط علي فرق والتخزين وغلاء الاسعار والا ما استمروا حتي الآن وانا عارف بقول ايه .. والتاجر فيها هو المظلوم علي عكس كل اللي بيتقال ... بدليل ان مشاريع كتيرة بتقفل وتفشل لتجار كتير في كل دخلة موسم شتوي ...
 
طبعا واحد ابن حلال هيقولي فيه 75 منتج تمويني مش بيرفعوا او غير خاضعين لسياسة الشركات ...
ايوة يا حبيبي معاك .. ما هو احنا مش المفروض هيكون كل طموحنا في الحياة زيت وسكر مع انهم حتي يعتبر اترفعوا  ..
الشعب مش هيقضيها كل يوم رز و بطاطس ومكرونة مثلا ... هتقولي فترة مؤقتة ... هقولك
اديني السياسة بتاعتك علي طول 10 سنين جاية واطرحها قدامي وخليني اؤمن بيك كقيادة وانا هكون في ظهرك .. انما طول ما انت ماشي بسياسة انا بعمل وبضحي ونعمل في صمت
والشعارات الكدابة دي عمري ما هصدقك ولا هؤمن بيك ..
 
هتقولي الدولة بتحسن الطرق والكباري .. هقولك ما هو بتاخد التحسين مننا برضه علي هيئة كارتات علي الطريق ممكن توصل ل 1000 جنيه للنقل التقيل ... يعني من جيوبنا برضه ..
 
المفروض الطموح بيزيد عندنا كشباب لما نفتح مشروع ..  بس العكس بيحصل بسبب ان التطوير في المشروع بيكون من سابع المستحيلات بسبب التكاليف الزيادة ...
ومع التكاليف في كساد رهيب في السوق ... وعدم اقبال من المواطن علي المنتجات التجارية .. وبالتالي بيعك مش علي اد تكلفتك ... وبالتالي غالبا بتنتهي بالفشل
واللي بينجح بسبب انه الاتموسفير بيخدموا انه في خمسة منافسين بطلوا وبالتالي بينجح علي فشلهم لانه بياخد حصة السوق كاملة ليه ..
 
المواطن تفكيره كالتالي انك تديله اللي يعيشه ..
70 في المية من المواطنين مرتباتهم 1600 جنيه حاليا وبيته محتاج صرف 4000 الاف جنيه اقل واجب ... انا ماجبتش سيرة العواطلية ولا الناس الفواعلية ولا الشغالين ب 1000 و1200 جنيه ...
بس انت قولي بيجيب الباقي ده منين .. ودي نكتة بايخة وقديمة ومعروفة .. بس بتكرر بشكل اوسع دلوقتي ...
 
اقولك انا ... المواطن بقا للاسف فاسد بطبيعته...
.. الا ما رحم ربي طبعا
بس دي حقيقة تتطبق علي ناس كتير
بس المواطن بيحللها بأشكال مختلفة ..كتير بياخد شئ مش من حقه ومابقاش يميز الصح من الغلط ...
 
انا هقولك علي سبيل المثال واحد شغال سواق او موزع
انت بتديله منتج وتقوله وزعه علي المحلات ...
وهديك مرتب 1500 مثلا وفي عمولة لو حققت كذا ... طبعا ماحدش بيبص علي العمولة
المنتج اللي بياخده ده بيزود هو عليه جنيه ولا اتنين ويرفعه علي المحل والمحل هيرفعه علي المواطن برضه ..
وفرضا هيبيع في اليوم 100 قطعة يعني هيحط في جيبه 100 ولا 150 جنيه وهو اصلا مرتبه مايجيش 60 جنيه
هو هيسميهم شطارة .... فرضا ماعرفش يطلع ب ال 100 جنيه دول
وكان فيه منافسين معاه في نفس المنتج ده ... فهو بيتفق مع زمايله السواقين في الاماكن دي ونقوله يا باشا احنا اولي بالجنيه الناس دول واكلينها والعة واحنا المظلومين في النص ومصاريفنا وحياتنا وكدا ... فرضا  اختلفوا مع بعض وواحد فيهم امين ومحترم وقالك لا انا هبيع بالسعر اللي طالع بيه ... هيرجع للي مشغله ويقوله السوق اتحرق يا باشا
ولازم ننزل في السعر .. هييجي ينزله السعر جنيه ... هيبيع هو بالسعر المتعارف عليه في السوق وهياخد من رزق اللي مشغله ... واحيانا ممكن ياخد من المحل واللي من مشغله ..
صاحب العمل هيروح يجيبله مندوب وهيزود علي نفسه تكلفة .. المندوب حالته الاقتصادية اقل من السواق اساسا وغالبا مرتبه اقل من السواق ولو متعلم فبيقسموا مع بعض في الاخر برضه ..  وبالتالي هنا العقلية صعبة ... وقيس الكلام ده علي كل شئ ... فده اسفل الهرم واللي بيحصل في شريحة كبيرة منه  .. شوف حتي الموظفين الحكوميين بتوعك والرشاوي مع ان حلم كل واحد مصري يطلع في وظيفة حكومية عشان الامن والانتخة ..
 
وفيه سمة تانية نتجت عما سبق في السوق اسفل الهرم وهو قلة الجهد عند العاملين ..
وبالتالي تستشعر أنهم مثقلين دائما او غير قادرين علي العمل كما كان قبل سنوات ..
طبعا جدي وجدك هيقولك ده عشان ماتربوش علي السمنة البلدي ..
ودي نظرية ام ابراهيم طبعا .. اما الحقيقة ان هذا بسبب اشياء كتيرة  اخري
ابرزها بوجهة نظري اما الاحساس الدائم بالذنب ... او المرحلة التالية وهو التبلد الدائم
بعد فقدان الاحساس بالذنب ... فاصبحت الحياة كنزهة خالية من الدوافع الايمانية ..
 
السوق المصري تربة خصبة لكل فساد وده بسبب التضخم اللي حصل في كل شئ ....
عاوز ترجع للناس الايمان والتقوي .. نفذ فكرة قوية زي الهند او زي المانيا ..
واحسبها صح ..
avatar
ahmed 22
عضو مشارك
عضو مشارك


تاريخ التسجيل : 22/01/2017
عدد المساهمات : 93
مكان الاقامة : بيتنا

الرجوع الى أعلى الصفحة اذهب الى الأسفل

رد: ليه ما نلغيش العملة .؟

مُساهمة من طرف فتى المهام الخفية في السبت 12 أغسطس 2017, 12:53 am

ههههههه


انت بتكلم مين يا حج 
احنا ماشيين بنظرية انتو متعرفووووش احنا فقرا اوي اوي اوي 
يا اخي البلد فيها كمية خيارات وفرص اقتصادية تخلينا  حاجة محترمة بس نقول ايه غير حسبنا الله ونعم الوكيل 


ولفت انتباهي انه مش بس الفساد في الكبار حتى  اصغر اصغر موظف او عامل برضو بيسرق وبيبرر  او بيغير المسمي وخلاص  والمقولة المشهورة كله بما يرضي الله 


المشكلة حتى لو طبقت فكرة الغاء فئات من العملة او العملة كلها  مفيش اللي اهم من تغيير شكل العملة  اللي هو المنظومة المتكاملة والقوية  
هو حكمة الحج سعد قالها زمان  مفيش فايدة 
وللاسف اللي بقي يرعب حكاية تأجيل الطوفان وبنعملش اي حاجة مع اننا كلنا حاسين انه قادم قادم


وبيقلك نؤيد لفترة جديدة الزعيم المفدي  
avatar
فتى المهام الخفية
عضو مشارك
عضو مشارك


تاريخ التسجيل : 08/07/2016
عدد المساهمات : 127
مكان الاقامة : سحابة

الرجوع الى أعلى الصفحة اذهب الى الأسفل

رد: ليه ما نلغيش العملة .؟

مُساهمة من طرف ahmed 22 في السبت 12 أغسطس 2017, 5:07 pm

انا عندي خطأ شنيع هنا
لما كنت بكلم علي الاقتراض ولسا واخد بالي دلوقتي لما كنت براجع الموضوع
مش عارف الموضوع مربك شوية هههههه
والظاهر اختلط عليا الكلام 


المهم 
احنا عندنا الفائدة علي الاقتراض تعتبر عالية  عندنا في مصر بالنسبة لدول العالم
يعني مش زي ما انا كاتب قليلة ..


احنا في مصر وصل النهاردة معدل الفائدة علي الافتراض من البنوك 18%
في حين مثلا اليابان عندها معدل الفائدة علي الاقتراض 1%


القائدة بتكون عالية 
لما الدول بتكون عندها مشاكل اقتصادية والتضخم زايد فيها
وبالتالي بتحاول تعمل حاجة تعكس التضخم ده ...


وبالتالي بتعلي الفايدة علي القروض
وبالتالي دي خطوة انها تقلل من اسعار السلع الاساسية ... 
وتحاول تحاصر الدولار .. وتعزز قيمة الجنيه ...

بس بيكون فيه نتيجة ليها انه بيحصل كساد في السوق 
والناس طبعا مش بتقترض من البنوك بسبب سعر الفايدة العالية
وبالتالي بتأجل اي خطط لتطوير كانت بتسعي ليه  ... 
واحنا علي فكرة نعتبر من اكتر دول العالم ان لم نكن من العشرة الاوائل ههههه
 اللي عندنا سعر القايدة العالية وده بيوحي بشكل كبير 
بالازمة الاقتصادية اللي عندنا .. يعني مؤشر واضح ..


وطبعا اللي حصل ده نتيجة لتعليمات صندوق النقد الدولي لما اخدنا القرض بتاعه 
اللي كان من اهم خطواته ان احنا ننفذ تعليماته الخاصة بيه 


وهي ان احنا نشيل الدعم علي السولار والحاجات دي
وفي نفس الوقت ماشيين بمراحل .. 
 لان القرض متقسم لاجزاء .. وكل دفعة بتيجي البلد 
طبقا لتنفيذ كل مرحلة ..
يعني بيعلمونا الادب بشياكة  ..


وده طبعا بعد ما خلصنا ال 40 مليار بتوع الامارات والسعودية ودول الخليج 
والكام مليار اللي كانوا في عهد مرسي واخدناها من قطر وتركيا 
واللي طالبوا باستردادها وبقوا حمل علينا بعد كدا ...

وبالتالي برضه ده ممكن يكمل نفس السياق اللي بكلم فيه ..
وهو ان احنا عندنا الميكس الفظيع ده في النص لا عارفين نطور من أنفسنا 
ولا عارفين نوقف تقهرنا ...


بسبب العجز الرهيب في الموازنة سواء داخليا او خارجيا ..
ويمكن اللي حصل ده جزء منه بسبب دوامة الديون اللي حصلت من بداية الثورات عموما
بالعامية كدا يعني مصروفاتنا اعلي من ايرادتنا ..
بس الفرق بقا كبيرررررر جدا .. 
بالاضافة للتعويم اللي زاد من قيمة الديون  ..




بس في ناس بتقول ان الفكرة مش أنك ترفع الفايدة علي القروض ومش ده الحل
بالعكس انت المفروض تخفضها عشان تشجع الاستثمار ..
لأنك لما يكون الفايدة قليلة انت بتشجع المستثمر انه يقترض وبالتالي
يزيد من قيمة المعروض في السوق 
وبالتالي الطلب بيزيد .. وبالتالي حجم الربح والانفاق بيزيد وبيغطي التكلفة...


غير لما ترفع الفايدة .. يعني بتعمل كساد في السوق
يعني الطلب بيقل علي البضاعة .. وبالتالي الارباح بتكون اقل
والتكلفة بتكون اعلي ... وبالتالي بتضطر تقلل من المرتبات او العمالة او غيره ...

بس كان فيه فترة في مصر من كام شهر كان فعلا الفايدة علي الاقتراض 11%
وبيدوا شهادات بلاتينية  ب 20 % و 16 %
وبالتالي نفس اللعبة ممكن تتلعب عادي ..

والله العظيم حوار الاقتصاد ده مربك 
تحسها لفة كبيرة وغريبة...مالهاش ملة ولا دين 
ا اخر موضوع اكلم فيه عن الحوار ده  هههههههه
avatar
ahmed 22
عضو مشارك
عضو مشارك


تاريخ التسجيل : 22/01/2017
عدد المساهمات : 93
مكان الاقامة : بيتنا

الرجوع الى أعلى الصفحة اذهب الى الأسفل

رد: ليه ما نلغيش العملة .؟

مُساهمة من طرف هديل روح في السبت 12 أغسطس 2017, 10:48 pm

يا أحمد أنا ضعيفة في الحساب هههههههههه خليك في السياسة أحسن Very Happy

أنا مش هعلق على حوار تغيير العملة والاقتراض والتضخم والاقتصاد .......... عشان ممكن يكون أكبر من مستوى استيعابي العاطفي والعقلاني كمان ههههههه بس هعلق على (الفساد الأصغر) في أسفل الهرم بحجة إنه (التجارة شطارة)

مبدأيا لو اتكلمنا من الناحية التسويقية .. فعلا التجارة شطارة .. والتاجر الشاطر زي ما بيقولوا يعبي الهوا في أزايز ويبيعه .. بس نظراً لأننا افتقدنا أسس التسويق فاتحول لـ تسويئ

ولو جينا نطبق الكلام دا على الأمثلة إللي أنت ذكرتها عن العاملين بالسياحة والسواقين والمناديب .. ممكن نحس فعلا إن دي مبررات للفساد في أسفل الهرم .. إللي هو أصلا اتسبب فيه فساد في أعلى الهرم .. مع إن أمثلتك تكاد تكون عادية جدااااا .. لأن المكاسب والخساير فيها (مجرد فلوس رايحة جاية) .. ولو جات ع الفلوس بس .. اممممم ممكن يكون سهل تسكيت الضمير بنسبة معينة!

وغالباً كلامي دا هيتفهم غلط جدااااااااااااااا لو اتقرأ بمنظور "لا تقربوا الصلاة .........." بدون إكمال الآية بـ "وأنتم سكارى"

لأن في حاجة احنا مش بنستوعبها .. أو صعب نقولها علناً حتى لو استوعبناها واعترفنا بيها سراً ... لأن لو قلناها علناً ممكن يتم انتقادنا بقسوة وتفسيرنا بشكل خاطئ من أصحاب العقول الضيقة جدااا وهم الغالبية للأسف ...
 
بس مش مشكلة هقول .................... وإللي يحصل يحصل ههههههههههههههههههههههه ... محدش له حاجة عندي Very Happy ... والواقع هو اللي بيفرض نفسه أنا مش بفرض حاجة .........

امممممممم (زي ما المبررات سهلة .. الشعارات بردو سهلة) .. بمعنى إنه مفيش حد نزيه مية بالمية .. حتى لو افترضنا في أنفسنا النزاهة المطلقة .. بغض النظر لأنه تبرير أو اضطرار .. بس حتى لو جينا من ناحية الحلال والحرام .. يكاد يكون صعب تلاقي وظيفة حلال مية في المية .. امممممم مش عارفة بس ممكن لأن كانلي تجارب أرهقتني نفسيا في الموضوع دا فاصطدمت بالواقع دا ......... وإن أحيانا الفكرة بتكون في محاولة الوصول لأقل درجة ممكنة من الحرام ..... بقدر المستطاع

وأنا بردو مش هقلبها درس دين في الكلام عن الحلال والحرام بأسلوب المشايخ .. لأن لو عملت كدا يبقى تقريبا هقعد في بيتي وأترهبن .. بس ع الأقل من منظوري أنا وبعد ما استفتيت قلبي ولو أفتوني الناس .. المهم إن ما يكونش في (ظلم) أو تعدي على حقوق الآخرين المعنوية والمادية .. وخصوصا لما الحقوق دي تكون معنوية أكتر من كونها مادية ..

في ناس بيتم التعدي على حقها المعنوي لدرجة بيكون عندها استعداد تدفع ألوفات عشان تنقذ أو تستعيد حقها المعنوي اللي تم التعدي عليه ...........

يعني مثلا ... وخليني أحط نفسي في مثال عشان أكون أقرب للواقع وما أطلقش أحكام عشوائية ...... طبعا مع اختلاف الدولة اللي أنا عايشة فيها .. بس الفكرة واحدة رغم المفارقات الاقتصادية في المستوى المعيشي ..

أول مثال .. وظيفة/ إدارة علاقات انترناشونال عبر الإيميل مع دور النشر الأجنبية .. واقناعهم بمنحنا ترخيص وعقد موافقة لنشر أجزاء من كتبهم الإدارية في مجلة شهرية .. وتوزيع كمية محدودة منها مجانا على الجامعات بهدف نشر العلم ومقابل مبلغ رمزي تافه جدا ولا يذكر

لما أنا أكون ماسكة الوظيفة دي وناجحة جدا فيها .. وأكتشف مع الوقت إن الشركة اللي أنا فيها بتطبع كميات مهولة من المجلات دي وتتاجر فيها (مش مجانا) ودي حقوق فكرية بيجي من وراها مكاسب مادية مهولة .. مقابل العقد اللي أنا نجحت أجيبه ليهم من خلال إيميل وأنا قاعدة على مكتبي .. "وطبعا صيغة العقد مظبطهولي الإدارة من البداية عشان نكون في السيف سايد" .. أنا بس اللي عليا أتواصل وأتفاوض وأقنع الطرف الآخر وأرسله صيغة العقد ..

برغم إنها شركة محترمة جدا ووظيفة محترمة جدا ومريحة جدا .. بس لما اكتشفت الشيء دا .. بدأت أحس بالذنب وإن فلوسي دي حرام .. ووقت تاني أقول لا دا أنا العبد المأمور .. ويرجع ضميري يأنبني .. قمت اتصلت على شيخ هههه .. قاللي حراااااااااام ومالك حراااااااااام وأكلك حراااااااااام ........ (أسلوبه ندمني إني كلمته أصلا هههه بس تاني يوم قدمت استقالتي)

مع إن الفكرة بالنسبة ليا مش في الحرام والحلال بحد ذاتها .. قد ما الفكرة في الظلم .. يعني لو الحرام دا بظلم بيه نفسي جايز ساعتها أعديها وأبرر لضميري .. بس لو الحرام دا بظلم بيه غيري وبتعدى بيه على حق غيري؟؟ هنا المشكلة .. الظلم مخيف فعلا لأن كما تدين تدان .. وأنا مش عايزة اتدان ..........

تاني مثال .. وظيفة/ إدارة تسويق لمركز طبي جدلية وتجميل .. والتسويق لأجهزة الليزر والخدمات التجميلية وإقناع العملاء بالأجهزة والخدمات

لما أكون ماسكة الوظيفة دي وناجحة جدا فيها .. وأكتشف مع الوقت إن الغازات اللي بتستخدمها الإدارة لتعبئة الأجهزة .. غازات مغشوشة للتوفير مش بيور .. وبالتالي بتتسبب ببعض حالات حروق من الدرجة الأولى أو حدوث نتائج عكسية .. وإن المواد التجميلية اللي بيتم حقنها في الجلد بعضها اكسبيارد وبعضها مغشوش ومخلوط بمواد ...........

وأرجع أحس بذنب فظييييييييييييييييييييييييييييييييع وأنا بسوّق للفظاعة دي .. لأن دا ظلم .. والناس دي خسايرهم بتكون أكبر من الفلوس .. وبيكون عندهم استعداد يدفعوا ألوفات لمعالجة خسايرهم دي

وبردو التسويق مبني أصلا على السمعة فماينفعش .. ودا هبل وتسويئ مش تسويق أصلا .. (فأرجع أقدم استقالتي)

وأمثلة كتيييييييييييييييييييييييييير يا أحمد .. بس مش عايزة أطول عليك لأني اتنططت من وظيفة لوظيفة خلال فترات قصيرة .. فاكتشفت حاجات كتييييييييييييييييييير زي دي

ويمكن المشكلة فيا .. عشان أنا دايما بكتشف .. ومعرفش أشتغل على عمايا .. لازم أجيب أصل وفصل كل حاجة ههههه .. وأعمل تحرياتي ......... وآخرتها اتصدم وأحس بالذنب .. أحيانا الجهل نعمة لأنه بيرفع عنك مسؤولية الذنب هههه  .. وفعلا في موظفين كتير فاكرين إن شغلهم حلال مية بالمية لمجرد إنهم جاهلين بالمستخبي .. عموما الحمدلله وظيفتي الحالية إلى حد ما معقولة لأن ع الأقل لحد دلوقتي قادرة أوصل فيها لمبررات ماتحسسنيش بالظلم بحق غيري .....

بس خليني أقف وقفة صادقة جداااااا مع نفسي ..

أنا دايما بيكون سهل عليا أستقيل في الحالات دي .. عشان أنا (مرافق) لأب مش مكفولة ملزمة بكفيل .. دا غير إنه الحمد لله ظروف حياتي كويسة.. ولا أنا مثلا مسؤولة عن حد ولا بصرف على حد ولا شايلة بمعنى الكلمة .. مسؤولية بيت وأطفال وايجار وكهربا وبنزين وزيت وسكر و.................. دا غير إنه سهل جدا أصلا آلاقي وظيفة بديلة .......................

لكن لو أنا حالي حال المواطن المصري الغلبان ........................................
إللي عافر ودفع دم قلبه عشان يجي السعودية بفيزا ومسؤول عن عائلة بيرسل ليها شهريا مبلغ معين .. ولما أكتشف إن وظيفتي في السعودية إللي عافرت عشانها كل دااااا فيها الثغرات الفظيعة دي ... يا ترى ساعتها هتصرف ازاي؟؟

طيب بلاش دي .. جايز ساعتها أنجح في الإختبار دا مهما كان التمن والخساير .. وجايز ما أنجحش  .. الله أعلم

لكن خلينا في الأصعب .. لو أنا حالي حال المواطن المصري الغلبان .........................
اللي عايش في مصر .. واقتصاد بلده زي الزفت .. وراتبه ولا حاجة بالنسبة لإلتزاماته .. وعنده عيال في البيت بيصرف عليهم وعلى اكلهم ومدارسهم وعلاجهم ومشاكلهم .. وعنده ايجار وفواتير وضرايب وبنزين و زيت وسكر ..................... و .........................

هل ساعتها هستقيل من وظيفتي بالسهولة دي بسبب شعوري بالذنب؟! ويا ترى أي شعور ساعتها هيتغلّب ع التاني شعوري بالذنب؟؟ ولا الشعور بالضغط والمسؤولية ناحية بيتي وأولادي والشعور بالنقمة على كل شيء اضطرني لكدا؟!

ولو ساعتها استقلت من وظيفتي اللي هيئتها محترمة بس فيها ثغرات فظيعة .. وماعرفتش أدبر وظيفة تانية .. هعمل ايه؟؟ هقتل؟؟ هسرق؟؟ هرقص ......... ؟؟ هههههههه ولا هشحت؟؟ .. ولا هقعد ع الرصيف أبيع مناديل؟؟ .. ولا هستلف وأذل نفسي؟؟ .. ولا أشتغل شغل مناديب بنفس طريقة المثال اللي أنت ذكرته؟؟ ولا خليني في وظيفتي بثغراتها الفظيعة أرحملي ؟؟

مش عايزة أجاوب ع السؤال عشان ما أحملش نفسي "ذنب" أنا ما ارتكبتهوش .. ربنا يغنيني وما يكتب عليا أرتكبه، اللهم آمين ........ بس أنا في الآخر زي أي إنسان بدين وبتدان  ............ واللي ايده في المايه مش زي اللي ايده في النار ..............

(الشيطان يعدكم الفقر ويأمركم بالفحشاء واللّه يعدكم مغفرة منه وفضلاً واللّه واسع عليم) .. وكلنا شئنا أم آبينا .. لاحظنا أم نلاحظ .. بنتأرجح بين الله والشيطان .. طول الوقت تقريبا

وإللي عايزة أقوله من كلامي دا إن مفيش إنسان نزيه مية بالمية

ولو هو اتصرف بنزاهة أوووي في موقف .. مش شرط يكون الموقف دا دليل على نزاهته .. لأنه ممكن لو اتعرض لموقف أشددددددد منه يتصرف تصرف معاكس تماما ......

وسيبك بقى من اللي يقولك أنا مستحيل ................... وأنا غير ......................... لأن اللي بينزه نفسه واللي بينتقد الناس ومش بيعذرهم هو أول واحد ربنا بيبتليه وبيوقع وقعة أصعب من وقعتهم ................

وفي ناس بتنزه نفسها لأنها مااصطدمتش بالواقع .. أو لأنها اصطدمت بموقف واحد ونجحت فيه .. فبيتباهوا بالشيء دا .. وبيفترضوا في أنفسهم النزاهة المطلقة .. مع إنهم ممكن في موقف أشددددد بكتييييييير يتصدموا في أنفسهم

مأ أنت ممكن تصمد وتتحمّل وتتمسك بنزاهتك لو الضغط اللي عليك طن واحد .. طيب لو 500 طن .. طيب لو ألف طن؟؟ والخيارات والبدائل اللي قدامك محدودة جداااا لدرجة تكاد تكون مش موجودة مقارنةً بالضغط دا

بس دا مايمنعش بردو إن الإنسان يقنع نفسه بإنه نزيه نزاهة مطلقة .......... ع الأقل عشان ممكن إقناعه لنفسه بالفكرة دي قد يساعده يصمد مهما حصل .....

المهم إنه في كل الحالات الواحد المفروض يقول "الحمدلله الذي عفانا مما ابتلى به غيرنا" ويدع الخلق للخالق

بمناسبة إنك مابتحبش القراءة هههه جرب تدي فرصة لقراءة رواية (الشيطان والآنسة بريم) لـ باولو كويلو .. هتلاقي منها ملفات بي دي اف على سيرش جوجل
قصيرة جداااااااااااا على فكرة ومع ذلك عرف يوصل خلال فصولها القصيرة جدا الفكرة دي إللي أنا أصلا بؤمن بيها من ناحية موضوع النزاهة .. وكان فيها عملة بردو هههههههه ...................

أنا فاهمة كويس إنك بتوصف الحالة في أسفل الهرم عشان تعكس وجود مشكلة في أعلى الهرم .. وفعلاً المشكلة أساساً في أعلى الهرم .. والمفروض يحلوها بطريقتهم بقى .. يغيروا العملة أو يحنطوها أو يقلبوها .. دي صنعتهم .. مش قد أنا في الكلام الكبير دا عشان أقول رأي فيه ههههههههههه

والاقتصاد المصري .. فعلا بيحمّل على المواطن المصري أطناااااااااااان وضغوطااااااااات (سواء كان مغترب أو عايش في مصر) وبيفرض عليه الفساد .. إللي بيخليه في أحسن حالات النزاهة بيكون محقق أقل درجة ممكنة من الفساد !!!!

احنا فعلاً بحاجة إلى وطن يُعيننا على أن نكون أكثر نزاهة .... يُعيننا أن لا نشارك في دائرة الظلم وأن نتجنب الفتن .. يُعيننا أن نثبت لأنفسنا في أشد المواقف وأقساها أننا على مستوى النزاهة التي تصورناها عن أنفسنا وبصدق ..... مش وطن يضغط علينا ويحملنا أطنااااااان فوق طاقتنا عشان يخرّج أسوأ ما فينا ويثبتلنا إننا أبشع مما نتصور .... !!!!!!!!!

ونلاقي إللي في أسفل الهرم عايشين في نفس الدوامة اللي بتخليهم يقولوا "حس بيا يحس بيك ربنا" ..... وإللي في أعلى الهرم بيقولوا "وأنا مين يحس بيا؟!" ويحلفوا إن هم كمان بقالهم عشر سنين تلاجتهم فاضية ويادوب مافيهاش غير مايه ويضحكوا العالم علينا!! What a Face  .... اممممممممم في فشل واااااضح في المنظومة وفي حاجة  جذرية غلط جدااااااااااا يمكن صعب استيعابي المتواضع يفهمها من كل الجوانب عشان أقترح حلول افتراضية زيك ........... بس كل إللي أقدر أستوعبه إننا كلنا هنشيل ذنب بعض لأجيال متتالية!!!

__________________________________________________
avatar
هديل روح
عضو مشارك
عضو مشارك


الجنس : انثى
تاريخ التسجيل : 14/07/2017
عدد المساهمات : 134
مكان الاقامة : وطني الجنة!

الرجوع الى أعلى الصفحة اذهب الى الأسفل

رد: ليه ما نلغيش العملة .؟

مُساهمة من طرف فتى المهام الخفية في الأحد 13 أغسطس 2017, 12:51 am

مممممم 
تصدقي يا فير كلامك خلاني اهرش هههه  
مش عارف كلامك مس نقطة دقيقة ولخبطني من فوق لتحت  في اثناء قراءة كلامك  جاء على بالي اللفتة الدينية " الحلال بين والحرام بين وبينهم أمور .."
وخطر على بالي برضو حتة الأمر الواقع والالتزمات والضغوطات  
رجعتيني لأيام الجيش في اخر شهور ههه مسكت الغرزة الاقتصادية للكتيبة اللي هو " الكانتين " رغم انه يظهر شيئ تافه بس تقريبا كان فيه كل العناصر وكمية ضغوط كبيرة  وحاجة من اتنين ان الواحد يسرق ههه ويعمل فلوس أو يتحبس ويدفع الوف مؤلفة من جيبه  ههه وانا لا عملت فلوس ولا دفعت او للامانة دفعت بس مش كتير   عملت بهلوان بفتكر التجربة دي  لان اول  شهر كنت ماشي بالمسطرة والقلم  فتفاجئت بالفجيعة كان فيه حاجة غلط في الحلقة فيه ثغرة  وطبعا بفضل البيئة والضغوط فعالجت الثغرة بالبهلوانية 
رغم اني لا سرقت ولا انسرقت وبالعكس دلعت العساكر  حتى في اخر استدعاء كانوا لسه فاكريني  لكن وقتها كنت بحث بأثم شوية ان الواحد بيضطر يضرب شرقها في غربها لمسايسة الامور 
وكلامك خطر على بالي شخصية سبحان الله الظروف الصعبة جمعتنا في الغربة وهو ده اللي كان بيتجسد فيه الضغوطات اللي قلتيها من ناحية غربة وعنده بيت  وحالة مصر هههه ولما الجنيه هبط صاحب الشغل المصري  بطريقة او باخرى تخلص منه  حسبها ال يعني بيعطيه 3000 درهم في الشهر بما يعادل 15000 ههه وزير يعني 
رغم انه كان سايب شغله وازمة هيعرف يعمل اقامة ولا لأ والموال ايه  لكن كان اكبر هاجس في حياته هو انه مفيش مليم واحد عليه شبهة يدخل جيبه   لدرجة انه فعلا كان بيسيب فلوس ليه لمجرد انه شاكك فيها  ورغم انه سنين طويلة عريضة بيسافر وساكن في مصر ببيت ايجار ومعملش اي حاجة  لكنه في اعتقادي سعيد  
بتذكر الآية .."وإن خفتم عيلة فسوف يغنيكم الله من فضله إن شاء إن الله عليم حكيم "
وانا احسد هذا الشخص الذي يملك الثقة واليقين الكبير رغم الضغوط في  أن يتخلى عن شيئ هو في أشد الحاجة اليه  ثقة في أن الله لن يضيعه 


مممم المعنى بدأ يرن في وجداني 
الأمانة قبل الندامة 
avatar
فتى المهام الخفية
عضو مشارك
عضو مشارك


تاريخ التسجيل : 08/07/2016
عدد المساهمات : 127
مكان الاقامة : سحابة

الرجوع الى أعلى الصفحة اذهب الى الأسفل

رد: ليه ما نلغيش العملة .؟

مُساهمة من طرف هديل روح في الأحد 13 أغسطس 2017, 5:22 am

فتى المهام الخفية كتب:مممممم 
تصدقي يا فير كلامك خلاني اهرش هههه  
مش عارف كلامك مس نقطة دقيقة ولخبطني من فوق لتحت  في اثناء قراءة كلامك  جاء على بالي اللفتة الدينية " الحلال بين والحرام بين وبينهم أمور .."
وخطر على بالي برضو حتة الأمر الواقع والالتزمات والضغوطات  
رجعتيني لأيام الجيش في اخر شهور ههه مسكت الغرزة الاقتصادية للكتيبة اللي هو " الكانتين " رغم انه يظهر شيئ تافه بس تقريبا كان فيه كل العناصر وكمية ضغوط كبيرة  وحاجة من اتنين ان الواحد يسرق ههه ويعمل فلوس أو يتحبس ويدفع الوف مؤلفة من جيبه  ههه وانا لا عملت فلوس ولا دفعت او للامانة دفعت بس مش كتير   عملت بهلوان بفتكر التجربة دي  لان اول  شهر كنت ماشي بالمسطرة والقلم  فتفاجئت بالفجيعة كان فيه حاجة غلط في الحلقة فيه ثغرة  وطبعا بفضل البيئة والضغوط فعالجت الثغرة بالبهلوانية 
رغم اني لا سرقت ولا انسرقت وبالعكس دلعت العساكر  حتى في اخر استدعاء كانوا لسه فاكريني  لكن وقتها كنت بحث بأثم شوية ان الواحد بيضطر يضرب شرقها في غربها لمسايسة الامور 
وكلامك خطر على بالي شخصية سبحان الله الظروف الصعبة جمعتنا في الغربة وهو ده اللي كان بيتجسد فيه الضغوطات اللي قلتيها من ناحية غربة وعنده بيت  وحالة مصر هههه ولما الجنيه هبط صاحب الشغل المصري  بطريقة او باخرى تخلص منه  حسبها ال يعني بيعطيه 3000 درهم في الشهر بما يعادل 15000 ههه وزير يعني 
رغم انه كان سايب شغله وازمة هيعرف يعمل اقامة ولا لأ والموال ايه  لكن كان اكبر هاجس في حياته هو انه مفيش مليم واحد عليه شبهة يدخل جيبه   لدرجة انه فعلا كان بيسيب فلوس ليه لمجرد انه شاكك فيها  ورغم انه سنين طويلة عريضة بيسافر وساكن في مصر ببيت ايجار ومعملش اي حاجة  لكنه في اعتقادي سعيد  
بتذكر الآية .."وإن خفتم عيلة فسوف يغنيكم الله من فضله إن شاء إن الله عليم حكيم "
وانا احسد هذا الشخص الذي يملك الثقة واليقين الكبير رغم الضغوط في  أن يتخلى عن شيئ هو في أشد الحاجة اليه  ثقة في أن الله لن يضيعه 


مممم المعنى بدأ يرن في وجداني 
الأمانة قبل الندامة 

امممممم
تصدق معاك حق تهرش هههه
أنا كان ناقص بس أغنيلكم آه لو لعبت يا زهر .... أو الدنيا ماشية بضهرها  Very Happy هههههههههه

على فكرة أنا من كم سنة كان ممكن تفكيري مختلف عن كدا وأحادي شوية ........ بس فعلا الواحد كل ما بيعيش وبيشوف وبيصطدم بالواقع بيبتدي يراجع نفسه وبيحس إن الحياه أصعب بكتييييييييييير مما كان يتصور ............. ومش عارفة بعد كم سنة كمان هيكون تفكيري وصل لايه ههههههه ربنا يستر

حلوة فكرة البهلوان ههههه وكتير بنضطر نعملها فعلا ..... وقد تكون فكرة مجزية ومناسبة لوضع معين خصوصا لو الوضع دا مؤقت ..... بس في أوضاع تانية بتجبرك تاخد قرار حاسم يا ده يا ده ........

وأكيد في أمثلة كتير حوالينا لأشخاص أثبتوا نزاهتهم في مواقف عديدة ومتنوعة ... وجميل إنهم يكونوا مثال وقدوة لينا ... ربنا يديمها عليهم نعمة ويثبتهم دايما

وربنا يثبتنا جميعا على طاعته لأنه فعلا الثبات على طاعة الله في حد ذاته نعمة المفروض نحمد عليها ربنا وماينفعش نتغرّ بيها على خلق الله عشان مايكونش ابتلاءنا فيها بسبب غرورنا دا ...........

__________________________________________________
avatar
هديل روح
عضو مشارك
عضو مشارك


الجنس : انثى
تاريخ التسجيل : 14/07/2017
عدد المساهمات : 134
مكان الاقامة : وطني الجنة!

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى
Google